သိပ္ပံပညာရှင်နှစ်ယောက် အပြန်အလှန်ပြောနေကြသည်။
"ကမ္ဘာပေါ်မှာ ပထမဆုံးလူသားပုံတူမျိုးပွားတဲ့ နည်းပညာကို စတင်အသုံးပြုခဲ့တာ ဘုရားသခင်ပဲဗျ။ အာဒမ်ရဲ့နံရိုးတစ်ချောင်းကို ထုတ်ပြီး ဖန်ဆင်းခဲ့တာ မဟုတ်လား"
"ဒါပေမယ့် ရာနှုန်းပြည့်မအောင်မြင်ပါဘူး။ အာဒမ်ရဲ့ပုံတူမဖြစ်ဘဲ ဧ၀ဖြစ်သွားတာပဲလေ"
* * * * * * * * *
မြ၀တီရုပ်မြင်သံကြားဌာနသည် ညပိုင်းထုတ်လွှင့်မှု ပြီးဆုံးကာနီးတွင် နောက်တစ်နေ့အစီအစဉ်ကို ကြေညာရာတွင် ကောင်းနိုးရာရာအကွက်ကလေးတွေကို ထုတ်နုတ်ပြီး နမူနာအဖြစ် ကြိုတင်ပြသလေ့ရှိ၏။
သောကြာနေ့တစ်နေ့တွင် နောက်တစ်နေ့အတွက် ကြိုတင်အစီရင်ခံ တင်ပြရာတွင် ည ခုနစ်နာရီမှာပြသမည့် ကိုရီးယားဇာတ်လမ်းတွဲနမူနာပိုင်းကို အရင်ပြသည်။ ထို့နောက် ညကိုးနာရီခွဲတွင် တိုက်ရိုက်ထုတ်လွှင့်မည်ဖြစ်သော ပရီးမီးယားလိဂ်
ဘောလုံးပွဲအတွက် ကစားကွက်တချို့ကို ထုတ်နှုတ်တင်ပြပြီး ကြေညာသည်။
ထိုအခါ မအူမလည်လူတစ်ယောက်က
"ဟာ...ဒီလူတွေ တော်တော်ပြီးစလွယ်လုပ်တာပဲ။ ပွဲစဉ်အဟောင်းကြီးထဲကဟာတွေ ပြန်ပြနေတယ်။
နက်ဖြန်ကန်မယ့်ပွဲထဲက ကောင်းတဲ့အကွက်ကလေးတွေ နမူနာပြတာမဟုတ်ဘူး"
ဟု ဆို၏။
* * * * * * * * *
ကုန်စည်ပြပွဲတစ်ခုဖြစ်၏။ ကုမ္ပဏီများသည် သူတို့ထုတ်လုပ်သော ကုန်ပစ္စည်းမျိုးစုံကို သရုပ်ပြပြီး ကြော်ငြာနေကြသည်။ ဒီအထဲမှာ လူစိတ်အ၀င်စားဆုံးကတော့ လျှပ်စစ်ဓာတ်အားပေးစက်တစ်လုံးဖြစ်၏။ ကုမ္ပဏီတာဝန်ခံတစ်ဦးသည် သူတို့၏ မီးစက်အကြောင်းကို အာပေါင်အာရင်းသန်သန် ရှင်းလင်းပြောပြနေသည်။
"ကျွန်တော်တို့ကုမ္ပဏီက နောက်ဆုံးထုတ်လုပ်လိုက်တဲ့ဂျင်နရေတာဟာဆိုရင် မြင်တဲ့အတိုင်းပါပဲ။ စက်သံကလည်း အလွန်ညက်ညောပါတယ်။ တုန်ခါမှုကလည်း မရှိသလောက်ပါပဲ။ နာရီပေါင်းများစွာဆက်တိုက် လျှပ်စစ်ဓာတ်အားကို ထုတ်လုပ်ပေးနိုင် ပါတယ်။ ဗို့အားအပြည့် ၀ပ်အားအပြည့်ထွက်ပါတယ်။ ပြီးတော့..."
ဝိုင်းအုံကြည့်နေသူတွေထဲမှ တစ်ယောက်က ကြားဖြတ်မေးလိုက်သည်။
"ဒါနဲ့ ခင်ဗျားမီးစက်က ဘာလောင်စာစွမ်းအင်ကို သုံးတာလဲ၊ ဒီဇယ်လား၊ ဓာတ်ဆီလား၊ ဂက်စ်လား"
ကုမ္ပဏီတာဝန်ခံက ဂုဏ်ယူဝင့်ကြွားစွာ ပြုံးလိုက်ပြီး
"ကျွန်တော်တို့ပစ္စည်းရဲ့အဓိကအားသာချက်က အဲဒါပါပဲခင်ဗျာ။ ဒီမီးစက်ကိုမောင်းဖို့ ဓာတ်ဆီလည်းမလိုဘူး၊ ဒီဇယ်လည်း မလိုဘူး၊ တခြားဘာလောင်စာမှလည်း မလိုဘူး။ ဟောဒီပလပ်ခေါင်းလေးကို ကိုယ့်အိမ်မှာရှိတဲ့ ပလပ်ပေါက်ထဲထိုးထည့်ပြီး မီးခလုတ်ကို ဖွင့်လိုက်ရုံပါပဲ"
လူရွယ်တစ်ယောက်သည် သူ့ချစ်သူကိုလက်ထပ်နိုင်ဖို့အတွက် အလုပ်ကို ပင်ပင်ပန်းပန်း ကြိုးစားလုပ်ခဲ့ရသည်။ ငွေကြေး ပြည့်စုံလာသဖြင့် မင်္ဂလာဆောင်ဖို့စီစဉ်တော့လည်း ခန်းမငှားဖို့လုပ်ရ၊ သတို့သမီးဝတ်စုံချုပ်ဖို့လိုက်ရ၊ ဖိတ်စာရိုက်ရ၊ ဖိတ်စာတွေ ဝေရတော်တော်အလုပ်ရှုပ်သွားသည်။ မင်္ဂလာအခမ်းအနားကျတော့လည်း တစ်စုံတစ်ခုအဆင်မပြေဖြစ်မှာကိုပူရ၊ ဧည့်သည်တွေကို နှုတ်ဆက်ရ ဖတ်ဖတ်မောပြီး ကျန်ခဲ့သည်။ ထိုအခါ သူက အောက်ပါအတိုင်း ညည်းညူလိုက်လေသည်။
"တော်ပါပြီဗျာ။ မှတ်လောက်သားလောက်ဖြစ်သွားပါပြီ။ နောက်နောင်ဆို ဘယ်တော့မှထပ်ပြီး မင်္ဂလာမဆောင်တော့ပါဘူး"
* * * * * * * * *
လူတစ်ယောက်သည် ကိစ္စရှိသဖြင့် သူ့မိတ်ဆွေထံသို့ ဖုန်းဆက်သည်။ ဖုန်းထဲမှာ မိန်းကလေးတစ်ယောက်၏ ဖြေကြားသံထွက်လာသည်။
"လူကြီးမင်းခေါ်ဆိုသော ပုဂ္ဂိုလ်မှာ ဂျီအက်စ်အမ်ဖုန်း ၀ယ်ယူထားခြင်းမရှိပါသဖြင့် ဆက်သွယ်၍မရနိုင်ပါရှင်"
* * * * * * * * *
မြို့နယ်ပေါင်းစုံမှလာတက်ကြသော သင်တန်းတစ်ခုမှာဖြစ်၏။ အားလပ်ချိန်တွင် စုဝေးစကားပြောနေကြစဉ် သင်တန်းသူတစ်ယောက်က သူတို့မြို့ကမိန်းကလေးများမှာ အလွန်ကြည့်ကောင်းကြောင်း၊ တစ်ရာမှာ ကိုးဆယ့်ကိုးယောက်လောက်က ချောမောလှပကြကြောင်း ကြွားနေသည်။ ကျန်သူများက ဒီလောက်ကြီးတော့လည်း မဖြစ်နိုင်ကြောင်း၊ ယုတ္တိမရှိကြောင်း ပြောကြသော်လည်း သင်တန်းသားတစ်ယောက်ကတော့
"သူပြောတာမှန်တယ်။ ကျွန်တော် လက်ခံတယ်"ဟု ထပြောသည်။
"မင်းက သူတို့မြို့ကို ရောက်ဖူးလို့လား"
ဝိုင်းမေးကြသောအခါ
"ရောက်ဖူးစရာတောင် မလိုပါဘူး။ သူ့ကိုမြင်လိုက်တာနဲ့ ကျန်တဲ့ကိုးဆယ့်ကိုးယောက်က လှမှာပဲဆိုတာ သိသာပါတယ်"
ဟု ပြန်ပြောလိုက်သည်။
* * * * * * * * *
တောရွာကလေးတစ်ရွာရှိ ဗီဒီယိုရုံတွင် တေးဂီတဖျော်ဖြေပွဲလိုက်ဖ်ရှိုးအခွေကို ပြသနေသည်။ စင်မြင့်ပေါ်ရှိ သီဆို တီးခတ်နေကြပုံကိုမြင်ရသည်။ ရောင်စုံဆလိုက်များ၊ ဒစ္စကိုမီးများနှင့် အဆန်းတကြယ်ရှိလှ၏။ ထို့အပြင် စင်မြင့်၏ ကြမ်းပြင်မှာလည်း မြူမီးခိုးတွေဝေ့၀ဲနေပုံပြုလုပ်ထားသည်။ ဒါကိုကြည့်ပြီး မိန်းမကြီးတစ်ယောက်က အော်ပြောလိုက်သည်။
"ကြည့်စမ်းပါဦး သူတို့မြို့မှာလည်း ခြင်တွေပေါများလိုက်တာ။ စတိတ်ခုံပေါ်မှာတောင် ဆနွင်းမှိုင်း တိုက်ထားရတယ်"
* * * * * * * * *
နှစ်အတော်ကြာအောင်ကွဲကွာနေကြသော မိတ်ဆွေနှစ်ယောက်တို့သည် ရန်ကုန်မြို့လယ်တစ်နေရာမှာ ပြန်ဆုံမိကြသည်။ တစ်ယောက်နှင့်တစ်ယောက် မာကြောင်း သာကြောင်း မေးမြန်းကြပြီးနောက် တစ်ယောက်က
"ခင်ဗျား စီးပွားရေးကောင်းရဲ့လား"
"အရင်လိုပဲပေါ့ဗျာ။ ရရစားစားပေါ့။ ခင်ဗျားကတော့ အခြေအနေကောင်းတယ်ဆို"
အရင်ကတော့ တော်တော်လေးအဆင်ပြေပါတယ်။ အခုနောက်ပိုင်းမှာတော့ အလုပ်ကပါးလွန်းလို့ စီးပွားပျက်မတတ်ဖြစ်နေပြီ"
"ခင်ဗျားအလုပ်က ဘာအလုပ်မို့လို့လဲ"
"မော်တော်ကားဟွန်းတွေ ပြုပြင်ရောင်းဝယ်တဲ့ အလုပ်ပေါ့ဗျာ"
* * * * * * * * *
ဆယ်တန်း(တက္ကသိုလ်ဝင်တန်း)စာမေးပွဲအောင်စာရင်းတွေ ထွက်ပြီးကာစအချိန်ဖြစ်၏။ အလှူတစ်ခုမှာ အမျိုးသမီးကြီးများ ဆုံမိကြပြီး မိမိတို့၏သားသမီးများအကြောင်း အသီးသီးကြွားဝါနေကြသည်။
"ကျွန်မသားက အောဒီလေ၊ တော့ပ်တင်းထဲပိါု့ သေချာသလောက်ရှိနေပြီ"
"ကျွန်မသမီးကတော့ ငါးလုံးပါတယ်။ သူက ဆေးကျောင်းကလွဲရင် ဘယ်ဟာမှ စိတ်မ၀င်စားဘူးဆိုတော့ အတော်ပဲဖြစ်သွားတာပေါ့"
"အိမ်ကတောင် နည်းနည်းပေါ့ဆချင်လို့ စိတ်ပူနေလိုက်ရတာ။ အောင်စာရင်းထွက်လို့ ဖိုးဒီ ဆိုတာ ကြားလိုက်ရမှပဲ ရင်ထဲက အလုံးကြီး ကျသွားတော့တယ်"
သူတို့ထဲတွင် ဂုဏ်ထူးတစ်ခုမှမပါဘဲ ရိုးရိုးသာအောင်သော ကျောင်းသားတစ်ယောက်၏အမေမှာ မျက်နှာငယ်နေရသည်။ နောက်ဆုံးတော့ အားကျမခံ ကြံဖန်ပြီး ဂုဏ်ယူလိုက်ရလေတော့သည်။
"ကျွန်မသားကတော့ ဂုဏ်ထူးတစ်ခုမှာမပါပေမယ့် ဘာသာတိုင်းမှာ အမှတ်လေးဆယ်ကျော်တာချည်းပဲ"
* * * * * * * * *
ကုမ္ပဏီဒါရိုက်တာကြီးတစ်ယောက်သည် ဌာနခွဲတာဝန်ခံများကို ရုံးချုပ်သို့ဆင့်ခေါ်ပြီး ဆူပူကြိမ်းမောင်းနေသည်။
"မနေ့ကညနေပိုင်းတုန်းက မင်းတို့ရုံးခွဲတွေအားလုံးကို ငါဖုန်းဆက်တယ်။ တစ်ယောက်မှမရှိကြဘူး။ မင်းတို့ တာဝန်ချိန်မှာ ဘယ်ရောက်နေကြသလဲ"
ဌာနခွဲမှူးတစ်ယောက်က ရို့ရို့ကလေးထရပ်ပြီး
"အရေးပေါ်ကိစ္စလေးရှိလို့ အပြင်ခဏသွားတာပါ။ ပြန်ရောက်ရောက်ချင်းဘော့စ်ရဲ့ရုံးခန်းကို ဆက်သွယ်ပါတယ်။ အပြင် သွားတယ်ဆိုလို့ ဘော့စ်ရဲ့လက်ကိုင်ဖုန်းကို ဆက်တော့လဲ ဖုန်းမကိုင်ပါဘူးခင်ဗျာ"
ဒါရိုက်တာကြီး စိတ်ဆိုးမာန်ဆိုး ပြန်ပြောသည်။
"ဘောလုံးပွဲထဲမှာ ဒီလောက်ဆူညံနေတာ ဖုန်းမြည်သံကို ဘယ်ကြားရပါ့မလဲကွ"
* * * * * * * * *
လင်မယားနှစ်ယောက်သည် အကြီးအကျယ်စကားများ ရန်ဖြစ်ကြသည်။ နောက်ဆုံးတော့ မိန်းမက အိမ်ပေါ်ကဆင်းမယ်ဟု ပြောပြီး အ၀တ်အစားတွေကို ခရီးဆောင်အိတ်ထဲ ထည့်သည်။ မိန်းမတို့ထုံးစံအတိုင်း အ၀တ်အစားကောင်းကောင်း၊ အဆင်အသွေးဆန်းဆန်း၊ အရောင်လှလှတွေကို ရွေးနေသေးသည်။ ဟိုဟာလေးလည်း ယူသွားချင်၊ ဒီဟာလေးလည်း ထည့်ချင်ဖြစ်နေသည်။ အ၀တ်အစားတွေကများပြီး အိတ်က သေးနေသည်။
ထိုအခါ ဘာမှမသိ နားမလည်ရှာသော သုံးနှစ်အရွယ်သမီးကလေးက
"အိတ်က သေးသေးလေး၊ ဖေဖေ့အ၀တ်အစားတွေနဲ့မှ အတော်ပဲနေမှာ"
ဟု ၀င်ပြောလိုက်လေသည်။
* * * * * * * * *
"ကုန်ပစ္စည်းတွေ ပေါပေါများများ လှိုင်လှိုင်ထွက်နေတဲ့အချိန်မှာ ကိုယ့်ပစ္စည်းကိုမရောင်းဘဲ လှောင်ထားလိုက်၊ ရာသီကုန်လို့ ရှားသွားပြီဆိုမှ ပြန်ထုတ်၊ ကျိန်းသေမြတ်တယ်"
ဟု ဘောဂဗေဒပညာရှင်က သူ့ဆီ အကြံညဏ်လာတောင်းသူကို လက်ချာရိုက်လွှတ်လိုက်သည်။ နောက်ခြောက်လခန့်ကြာသောအခါ ထိုသူပြန်ရောက်လာပြီး
"ဆရာ့အကြံညဏ်က အလုပ်မဖြစ်ပါဘူးဗျာ"
ဟု ဆိုသဖြင့် ဘောဂဗေဒပညာရှင်က
"ဘာဖြစ်လို့လဲ"
"ဆရာပြောသလို ကုန်ပစ္စည်းတွေကို အောင်းထားပြီး ရာသီကုန်မှ ပြန်ထုတ်ရောင်းတာပဲ။ ဘယ်သူမှ မ၀ယ်ကြဘူး"
"ခင်ဗျားက ဘာပစ္စည်းတွေ လှောင်ထားလို့လဲ"
"ပြက္ခဒိန်တွေပါ ဆရာရယ်"
* * * * * * * * *
ဆရာက အမေရိကန်ပြည်တွင်းစစ်အကြောင်း ရှင်းပြပြီးနောက် တပည့်တစ်ယောက်ကို မတ်တပ်ရပ်ခိုင်းပြီးမေးလိုက်သည်။
"အမေရိကန်ပြည်တွင်းစစ်မှာ ထင်ရှားတဲ့သမ္မတကြီးက ဘယ်သူလဲ"
"လင်ကွန်းပါ ဆရာ"
"အေး ဒါဆိုရင် လင်ကွန်းရဲ့မိန်းမနာမည်ကကော"
တပည့်ကမဖြေနိုင်သဖြင့် ဘေးကနောက်တစ်ယောက်ကို မေးသည်။
"မင်းကောသိလား"
ဒုတိယတပည့်က မတ်တပ်ရပ် လက်ပိုက်ပြီးဖြေသည်။
"လင်ကွန်းရဲ့မိန်းမနာမည်က မယားကွန်းပါဆရာ"
* * * * * * * * *
ကိစ္စတစ်ခုနှင့်ပတ်သက်ပြီး မောင်နှမနှစ်ယောက်ငြင်းခုန်နေကြသည်။ အစ်မက
"နင် ငါနဲ့ပြိုင်မငြင်းနဲ့။ ဒီမှာ ငါက နင့်ထက် အရင်ထမင်းစားတာ သိရဲ့လား"
ဟု အနိုင်နှင့်ပိုင်းဖို့ကြိုးစားရာ မောင်ငယ်က
"ဒါတော့ အစ်မက ကျောင်းကနေ အိမ်ကို စောစောပြန်ရောက်တာကိုး"
ဟု ပြန်လည်ချေပလိုက်သည်။
* * * * * * * * *
လင်မယားနှစ်ယောက်စလုံး အပြင်ထွက်လာပြီးကာမှ အိမ်ကကြောင်ကလေးကို အစာမကျွေးခဲ့မှန်း သတိရသည်။ ထို့ကြောင့် အိမ်ကို ဖုန်းလှမ်းဆက်သည်။ အိမ်ဖော်မိန်းကလေးက ဖုန်းလာကိုင်သည်။
"ကြောင်ကလေးကို အစာမကျွေးရသေးဘူး။ အဲဒါ ထမင်းနဲ့ပုဇွန်ခြောက်မှုန့်နဲ့ နယ်ကျွေးလိုက် ကြားလား"
အိမ်ဖော်မိန်းကလေးက ဘာမှပြန်မပြော။
"ဟဲ့ ကြားလား"
ဘာသံမှမကြားရ။
"ဟဲ့ မေးနေတယ်လေ၊ ကြားလား" ဆိုတော့မှ
"ဟုတ်ကဲ့..ကြားပါတယ်"
"ကြားတယ်ဆို စောစောကဘာဖြစ်လို့ ပြန်မပြောတာလဲ"
"ကျွန်မ ခေါင်းညိတ်ပြနေတာပဲဟာ"
* * * * * * * * *
လူငယ်တစ်ယောက်သည် ကုမ္ပဏီတစ်ခုသို့ အလုပ်လာလျှောက်သည်။ လျှောက်လွှာလက်ခံသူက စာရွက်စာတမ်းများကို
ကြည့်ရှုစစ်ဆေးသည်။ သွေးအမျိုးအစား ခွဲခြားစစ်ဆေးထားသောစာရွက်ကိုကြည့်ပြီး
"သွေးအမျိုးအစားက ဘီသွေး မဟုတ်လား"
"ဟုတ်ပါတယ်"
"ဒါပေမယ့် ဒီသွေးစစ်ချက်က လွန်ခဲ့တဲ့ဆယ်နှစ်လောက်က စစ်ဆေးခဲ့တာဖြစ်နေတယ်။ အသစ်ထပ်စစ်ပြီး ယူလာခဲ့ပါ"
ဟု ဆိုသဖြင့် လူငယ်မှာ အတော်အူကြောင်ကြောင်ဖြစ်သွားရလေသည်။
(မှတ်ချက်။ ။ လူတို့တွင် အေ၊ ဘီ၊ အေဘီနှင့် အို ဟူ၍ သွေးအမျိုးအစားကွဲပြားမှုရှိသည်။ လူတစ်ယောက်သည် မွေးရာမှ သေသည်အထိ သွေးအမျိုးအစားတစ်မျိုးတည်းသာရှိပြီး ဘယ်သောအခါမှာမှ ပြောင်းလဲမှုမရှိပါ။)
* * * * * * * * *
ကလေးငယ်တစ်ယောက်သည် ကျောင်းမှပြန်ရောက်ရောက်ချင်း သူ့အမေကိုမေးသည်။
"သားသူငယ်ချင်းတွေမှာ အဘိုးရှိပြီး သားမှာတော့ ဘာဖြစ်လို့မရှိတာလဲ"
"ရှိပါတယ် သားရဲ့။ သားအဘိုးက သားငယ်ငယ်လေးကတည်းက ဆုံးသွားလို့ပါ"
"ဟင် ဒါဆို သားကိုမွေးတဲ့အချိန်မှာ အဘိုးရှိသေးတာပေါ့"
"ဟုတ်တာပေါ့"
"ဟာ ဒါဆိုဟုတ်ပြီ။ ကျောင်းမှာ သားကိုနှိမ်တဲ့ကောင်တွေကို ပြန်ပြောလို့ရပြီ"
"သူတို့က ဘယ်လိုနှိမ်လို့လဲ"
"သားကို အဘိုးမပေါ်ဘဲ မွေးတဲ့မြေးလို့ ပြောနေကြတယ်လေ"
* * * * * * * * *
ဧည့်ခံပွဲတစ်ခုတွင် လူစုမိနေခိုက် ဆရာဝန်တစ်ယောက်က နောက်ဆုံးပေါ်ခေတ်မီဆေးပညာအကြောင်း ရှင်းပြနေသည်။
"အခုဆိုရင် တချို့ခွဲစိတ်မှုတွေမှာ ဗိုက်ကို ခွဲနေစရာမလိုတော့ဘူး။ သော့ပေါက်ခွဲစိတ်မှုဆိုတဲ့နည်းကို သုံးနေကြပြီ။ ဗိုက်ကို အပေါက်သေးသေးလေးပဲဖောက်ပြီး အထဲကို ခွဲစိတ်ကိရိယာသေးသေးလေးကိုထည့်ပြီး ကုသလို့ရနေပြီ။ ဘယ်လောက်သက်သာ လွယ်ကူသလဲ"
ထိုအခါ မိန်းမတစ်ယောက်က
"ဟာ ဒါဆို ဟန်ကျတာပဲ။ ကျွန်မ ဒီတစ်ခါ ကလေးမွေးရင်အဲဒီနည်းနဲ့မွေးရမယ်"
ဟု အားတက်သရော ၀င်ပြောလိုက်လေသည်။
* * * * * * * * *
မန္တလေးမြို့ကြီးသို့ တောမှတက်လာသော ဘကြီးကို တူဖြစ်သူက ဘုရားစုံလိုက်ပို့ရန် စီစဉ်သည်။ သက်သက်သာသာ
သွားလာနိုင်ရန် ကားတစ်စင်းငှားသည်။ ဘကြီးက ကားကိုကြည့်ပြီး
"မင်းနှယ်ကွာ၊ ဘီးပေါက်လို့သွားဖာနေတဲ့ကားကိုမှ ရွေးငှားရသလား၊ ဘီးပြန်တပ်မှာနဲ့ဆို အကြာကြီး စောင့်နေရမှာပေါ့"
ဟု အပြစ်တင်သည်။ ထိုကားမှာ သုံးဘီးကားဖြစ်၏။
* * * * * * * * *
ဆရာဖြစ်သူက ကမ္ဘာမှာ ထင်ရှားကျော်ကြားသောနိုင်ငံ့ခေါင်းဆောင်များအကြောင်း သင်ကြားပြီးနောက် မေးခွန်းထုတ်လိုက်၏။
"အမေရိကန်နိုင်ငံရဲ့ ပထမဆုံးသမ္မတကြီးနာမည်ကို ဘယ်သူသိသလဲ"
ရှေ့ဆုံးတန်းမှ ခပ်သွက်သွက်ကျောင်းသူတစ်ယောက်က ထရပ်ပြီး
"ဂျော့ဝါရှင်တန်ပါ ဆရာ"
"အေး၊ မှန်တယ်။ ၀ါရှင်တန်ပြီးတော့ နောက်တက်တဲ့ သမ္မတကကော ဘယ်သူလဲ"
တစ်ယောက်မှ မဖြေနိုင်ကြ။
"၀ါရှင်တန်ပြီးတော့ ဘယ်သူလဲ"
ဆရာက ထပ်မေးသည်။ ခဏကြာမှ နောက်ဆုံးတန်းထောင့်မှာ ထိုင်နေသော မှုန်ကုပ်ကုပ်ကျောင်းသားလေးက ထရပ်ပြီးဖြေသည်။
"နယူးယောက်"
* * * * * * * * *
ယောက်ျားဖြစ်သူက အလုပ်က ပြန်လာသောအခါ မိန်းမက ဆီး၍ပြောသည်။
"ဒီနေ့ အိမ်ကို ဧည့်သည်မိန်းမတစ်ယောက် လာတယ်။ ရှင်က အရေးတကြီးသုံးစရာရှိလို့ ငွေ ငါးသောင်း ပေးလိုက်ပါလို့ မှာလိုက်တယ်တဲ့"
"ဟင် မင်းက ပေးလိုက်သလား"
"ပေးလိုက်တာပေါ့"
"ဟာ... ငါလည်း မတောင်းခိုင်းပါဘူး။ သွားပြီ မင်းတော့ အလိမ်ခံလိုက်ရပြီ"
"သူက ယုံလောက်အောင် ပြောတာကိုး"
"ဘယ်လိုပြောလို့လဲ"
"သူက ရှင့်ရည်းစားဟောင်းတဲ့"
* * * * * * * * *
မြို့ပေါ်တက်ပြီး အလုပ်အကိုင်ရှာနေသော သားထံမှ ရွာရှိအဖေထံသို့ လူကြုံနှင့် စာတစ်စောင်ရောက်လာသည်။
"အဖေ၊ ကျွန်တော်တော့ "တီစီ"အလုပ်ရပြီ။ ဒါကြောင့် ပထမဆံးရတဲ့လခထဲက အဖေ့ဆီ ခွဲပို့လိုက်ပါတယ်။ နောင်လည်း အလျဉ်းသင့်သလို ငွေပို့ပေးပါ့မယ်"
အဖေဖြစ်သူမှာ အတော်ဝမ်းသာသွားသည်။ ပြီးတော့ လူကြုံကိုမေးသည်။
"တီစီဆိုတာ ဘာအလုပ်လဲကွ"
"လက်မှတ်စစ်ကို ပြောတာပါ"
သားဖြစ်သူဆီက လာစဉ်လိုလို ငွေရောက်လာသည်။ နောက်ပိုင်းကျတော့ ခြောက်လလောက်ကြာအောင် ငွေမပို့ဘဲနေသဖြင့် စိတ်ပူစရာဖြစ်လာ၏။ တစ်ရက်မှာတော့ လူကြုံမှတစ်ဆင့် စာတစ်စောင်ရောက်လာသည်။
"အဖေ၊ ကျွန်တော် တီဘီဖြစ်နေလို့ ငွေသုံးသောင်းလောက် ပို့ပေးလိုက်ပါ"
စာကို ဖတ်ပြီးနောက် အဖေလုပ်သူက
"တော်တော်အသုံးမကျတဲ့ကောင်၊ မဟုတ်တာတွေ လုပ်နေပြီထင်တယ်။ တီစီဖြစ်နေတုန်းကတောင် အိမ်ကိုငွေပို့နိုင်သေးတယ်။ အခုရာထူးတိုးပြီး တီဘီဖြစ်တော့မှ ငါ့ဆီကတောင် ငွေပြန်တောင်းရသလား"
ဟု ဒေါသတကြီးပြောလိုက်သည်။
(မှတ်ချက် ။ ။ တီဘီ = အဆုတ်နာရောဂါ)
* * * * * * * * *
ဟစ်ဟော့ပ်လူငယ်အဆိုတော်လေးကို အင်တာဗျူးလုပ်သူက မေးသည်။
"မောင်လေးရဲ့နောက်ဆုံးထွက်တဲ့သီချင်းခွေက အခြေအနေ ဘယ်လိုရှိသလဲ"
"အခြေအနေကတော့ အဲဒါကိုသာကြည့်ပေတော့"ဟု သူ၏ စူပါဆလွန်းကားလေးကို လက်ညှိုးထိုးပြရင်း ပြန်ဖြေသည်။
"အမယ် တယ်ဟုတ်ပါလား။ သူများတွေမှာ ခိုးကူးသမားတွေ သောင်းကျန်းလို့ ခွက်ခွက်လန်အောင် ကွဲနေတဲ့အချိန်မှာ မောင်လေးက ကားတောင်ဝယ်နိုင်တယ်ဆိုတော့ အခြေအနေကောင်းတယ်ထင်တယ်"
အဆိုတော် လူငယ်လေးက ပြန်ပြောသည်။
"ဒီကားက ၀ယ်တာမဟုတ်ဘူး၊ လဲလိုက်တာ။ ကျွန်တော်အရင်စီးတဲ့ကားက မာစီဒီးဗျ"
* * * * * * * * *
တိုင်းရင်းဆေးခန်းတစ်ခုသို့ လူနာတစ်ယောက်လာပြသည်။ သမားတော်က သေချာစွာ စမ်းသပ်ကြည့်ရှုလေးလာပြီးနောက်
"မစိုးရိမ်ပါနဲ့ အပူလွန်ကဲလို့ဖြစ်ရတာပါ။ ဟောဒီသွေးဆေးကို မနက်တစ်ကြိမ် ညတစ်ကြိမ် ကွမ်းသီးတစ်ခြမ်းစာလောက် သောက်ပေးပါ"
ဟု မှာကြားလိုက်သည်။
သုံးရက်ခန့်ကြာသောအခါ လူနာသည် တစ်ခေါက်ပြန်ရောက်လာပြီး
"ဆရာကြီးရဲ့ဆေးကြောင့် ကျွန်တော့်ရောဂါ တော်တော်ကြီး သက်သာသွားပါပြီ။ ဒါပေမယ့် ဆေးတစ်ခါသောက်တိုင်း ကွမ်းသီးတစ်ခြမ်းပါ ရောမျိုရေတာကတော့ တော်တော်ဒုက္ခရောက်ပါတယ်ခင်ဗျာ"
ထိုသူမှာ ရှက်တတ်သဖြင့် ၄င်းသည် နားလေးသူဖြစ်ကြောင်း ဖွင့်မပြောဖြစ်ခဲ့ချေ။
* * * * * * * * *
ဌာနတစ်ခုသို့ လူကြီးတစ်ယောက်ရောက်ရှိလာပြီးသက်ဆိုင်ရာတာဝန်ခံဝန်ထမ်းကို မေးသည်။
"ဦးလေးတင်ထားတဲ့လျှောက်လွှာများ ကျပြီလား သိပါရစေ"
ဝန်ထမ်းက စာရင်းစာအုပ်ကိုလှန်၍ရှာဖွေကြည့်ပြီးနောက်
"မကျသေးဘူး။ နောက်အပတ်လောက်မှ လာကြည့်ပါ"
"ဦးလေးလျှောက်လွှာတင်ထားတာ အရက်နှစ်ဆယ်လောက်တောင် ရှိနေပြီ"
"ဟုတ်ကဲ့ အထက်ကို တင်ပြထားလို့ပါ"
"သြော်..သြော်.. ဒါနဲ့အထက်ရုံးဆိုတာ တော်တော်ဝေသလားကွယ့်"
"အပေါ်ထပ်မှာပါခင်ဗျာ"
* * * * * * * * *
စက်ရုံပိုင်ရှင်သူဌေးသည် လာနေကျအချိန်မဟုတ်ဘဲ အလစ်အငိုက်မှာ စက်ရုံတွင်းသို့ ရုတ်တရက် ၀င်ရောက်စစ်ဆေးသည်။ အလုပ်သမားများမှာ စကားဝိုင်းဖွဲ့ပြောသူပြော၊ ဆေးလိပ်ဖွာသူဖွာ၊ လမ်းသလားသူက သလားရင်း သက်သာသလိုနေနေကြသည်။ သူဌေးဝင်လာတာမြင်မှ ပြူးပြူးပြာပြာဖြစ်ပြီး တာဝန်ကျရာ စက်ကိရိယာတွေဆီ သုတ်ခြေတင်ပြေး၍ ဟန်မပျက်အလုပ်လုပ်နေကြသည်။
စက်ရုံသူဌေးက အပေါက်ဝမှာ ခါးထောက်ရပ်လိုက်ပြီး
"တော်တော် အချောင်ခိုချင်တဲ့ကောင်တွေ၊ မင်းတို့က အခုမှ အလုပ်လုပ်ချင်ယောင် ဆောင်နေကြတာပေါ့ ဟုတ်လား"
ဘယ်သူမှ တုတ်တုတ် မလှုပ်ရဲကြ။ ခဏကြာမှ လူငယ်အလုပ်သမားတစ်ယောက်က
"ကျွန်တော်တို့က အလုပ်လုပ်ချင်ယောင်ဆောင်ရတာပေါ့။ သူဌေးကလည်း လခပေးချင်ယောင် ဆောင်တာကိုး"
ဟု တုံ့ပြန်ချေပလိုက်၏။
* * * * * * * * *
သားသားနားနား ၀တ်စားထားသောလူကြီးတစ်ယောက်သည် ဆေးရုံဂိတ်ပေါက်ဝသို့ရောက်ရှိလာပြီး
"ဟေ့ ဒီနေ့ခွဲစိတ်ကုသတဲ့လူနာကို ငါ သွားကြည့်ချင်တယ်"
အပေါက်စောင့်ဝန်ထမ်းက
"၀မ်းနည်းပါတယ်ခင်ဗျာ။ ဧည့်သည်ချိန် လွန်နေပါပြီ။ ပြီးတော့ လူနာကလည်း နေ့လယ်ကမှ ခွဲစိတ်ကုသထားတာဆိုတော့ အထူးကြပ်မတ်ခန်းထဲ ရောက်နေပါတယ်။ အပြင်လူ ၀င်ခွင့်မရှိပါဘူး"
"ခက်တာပဲ။ ငါက အလုပ်များတယ်။ အားတဲ့အချိန်လေး လာရတာ"
"စိတ်မရှိပါနဲ့ခင်ဗျာ။ ဆေးရုံစည်းကမ်းအတိုင်း လုပ်ရတာပါ"
လူကြီးက လေသံပြောင်းလိုက်ပြီး
"ငါက သူ့အထက်အရာရှိကွ၊ နားလည်လား"
"သြော် ဟုတ်ကဲ့၊ ဟုတ်ကဲ့၊ ခဏလေးစောင့်ပါနော်။ ကျွန်တော် အခုပြန်လာခဲ့ပါ့မယ်"
"မင်းက ဘယ်သွားမလို့လဲ"
"လူနာကို သွားခေါ်လာခဲ့မယ်လေ"
* * * * * * * * *
ဘတ်စ်ကားတစ်စင်းနှင့်တစ်စင်း အပြိုင်မောင်းပြီး ခရီးသည် လုတင်နေသောအချိန်ဖြစ်၏။ ဘတ်စ်ကားတစ်စင်းသည်နောက်ကားကို အဆက်ဖြတ်ရန် အမြန်မောင်းလာပြီး မှတ်တိုင်တစ်ခုမှာ ထိုးရပ်သည်။ စပယ်ယာက
"ကဲ..ခပ်သွက်သွက်ဆင်းပါ။ မြန်မြန်လုပ်ကြနော်"
ခရီးသည်များမှာ အပြေးအလွှားဆင်းကြရသည်။ သို့ရာတွင် နောက်ဆုံးမှ အဘိုးကြီးတစ်ယောက်ကတော့ ခပ်ဖြည်းဖြည်းပင် အေးအေးဆေးဆေးဆင်းနေသည်။ စပယ်ယာက စိတ်မရှည်တော့ဘဲ လှမ်းငေါ့လိုက်သည်။
"ခေတ်ဟောင်းမင်းသားကြီးခင်မောင်ရင် ဆင်းအုန်းမယ်တဲ့ ဆရာရေ့"
အဘိုးကြီးမှာ ဂရုမစိုက်ဟန်ဖြင့် ဆင်းသွားပြီး အောက်ရောက်မှ စပယ်ယာကို လှမ်းအော်ပြီး ပြန်နှိပ်လိုက်သည်။
"ဟေ့ကောင်၊ ဗိုလ်အောင်ဒင် ဒီညအိမ်ပြန်မအိပ်ဘူးလို့ မင်းအမေ မြမြ၀င်းကို ပြောလိုက်ကြားလား"
ဆိုပြီး တဟားဟား ရယ်လိုက်လေသည်။
* * * * * * * * *
ရုပ်မြင်သံကြားမှပြသသော ကိုရီးယားဇာတ်လမ်းတွဲများတွင် ကုမ္ပဏီအရာရှိများကို "ဒါရိုက်တာရင်၊ မန်နေဂျာကင်"စသည်ဖြင့် ရာထူးနှင့် မျိုးရိုးအမည်ကို တွဲခေါ်လေ့ရှိသည်။ ဇာတ်လမ်းတစ်ခုမှာ ဌာနမှူးသည် ကျောက်မျိုးနွယ်ဖြစ်သောကြောင့် "ကျောက်ဌာနမှူး"ဟု ခေါ်သည်။ ထိုမင်းသားမှာ လူကြိုက်များသဖြင့် ရုပ်သံပရိသတ်ကြားမှာ ရေပန်းစားလှသည်။
တစ်ရက်တွင် အိမ်တစ်အိမ်တွင် စာရေးဝန်ထမ်းမိန်းကလေးများ ဆုံကြရာ ကိုရီးယားဇာတ်လမ်းတွေအကြောင်း ပြောရင်း "ကျောက်ဌာနမှူး"ဆိုသောအမည်က မကြာခဏ ပါနေသည်။ ထိုအခါ ခပ်လှမ်းလှမ်းမှ နားထောင်နေသော ပင်စင်စားအဘိုးကြီးက ဘုမသိ ဘမသိ ၀င်ပြောသည်။
"ဟဲ့...နင်တို့ရုံးကဌာနမှူးက တော်တော်ကြောက်တတ်လို့ ဒီနာမည်ပေးထားတာလား။ ငါတို့တုန်းကဆိုရင် ကိုယ်ကသာ မှန်မှန်ကန်ကန်လုပ်လို့ကတော့ အရေးပိုင်တောင် ကြောက်စရာမလိုဘူး"
* * * * * * * * *
လူတစ်ယောက်သည် ဆေးလိပ်အလွန်ကြိုက်တတ်သည်။ အဆက်မပြတ်သောက်သဖြင့် မကြာခဏ ချောင်းတဟွတ်ဟွတ် ဆိုးပြီး ချူချာနေသည်။ ထို့ကြောင့် သူ့မိန်းမက သည်းမခံနိုင်တော့ဘဲ ရာဇသံပေးရသည်။
"ရှင် ကျွန်မကို ကွာမလား၊ အဲဒီဆေးလိပ်ကို ဖြတ်မလား"
"မင်းကိုတော့မကွာနိုင်ဘူး ဆေးလိပ်ပဲ ဆက်သောက်တော့မယ်"
ဟု အူကြောင်ကြောင်လုပ်ပြီး လွတ်အောင်ရှောင်သွားသည်။ နောက်တော့ တစ်ဆင့်တက်ပြီး အရက်ကိုပါ အလွန်အကျွံသောက်လာ၏။ ကြာတော့ ခြေထောက်တွေ ထုံကျင်ကိုက်ခဲလာသဖြင့် ဆရာဝန်သွားပြသည်။ စမ်းသပ်ကြည့်ပြီးနောက် ဆရာဝန်က ပြောသည်။
"ခင်ဗျား ခြေထောက်သွေးကြောတွေက ကျဉ်းနေပြီ။ ကြာရင် ပိတ်ဆို့ပြီး ဒုက္ခများတော့မယ်။ ခင်ဗျားမှာ ရွေးစရာ နှစ်လမ်းပဲရှိတယ်။ ဆေးလိပ်နဲ့အရက်ကိုဖြတ်မလား၊ ခြေထောက်ဖြတ်မလား၊ ဒါပဲ"
"တစ်ပတ်လောက်တော့ စဉ်းစားပါရစေ ဆရာ"
"ကောင်းပြီ"
တစ်ပတ်ကြာသောအခါ ထိုသူသည် ဆေးခန်းသို့ ကိုယ်တိုင်မလာဘဲ စာတိုကလေးတစ်စောင်သာ ပို့လိုက်သည်။
"ကျွန်တော် ဆရာ့ကို အဆက်ဖြတ်လိုက်ပြီ"
* * * * * * * * *
မင်းလူ
(ရယ်မောခြင်းအပိုင်းအစများ)လူဗိုလ်မှကူးယူတင်ပြသည်။
No comments:
Post a Comment